ПАМЯТЬ И ПОХВАЛА КНЯЗЮ РУССКОМУ ВЛАДИМИРУ (Текст)

Библиотека литературы Древней Руси / РАН. ИРЛИ; Под ред. Д.С. Лихачева, Л.А. Дмитриева, А.А. Алексеева, Н.В. Понырко. – СПб.: Наука, 1997. – Т. 1: XI–XII века.

Подготовка текста, перевод и комментарии Н.И. Милютенко

Оглавление

Текст

Перевод

Примечания

Комментарии

ПАМЯТЬ И ПОХВАЛА КНЯЗЮ РУССКОМУ ВЛАДИМИРУ

КАКО КРЕСТИСЯ ВОЛОДИМЕРЪ, И ДЕТИ СВОЯ КРЕСТИ, И ВСЮ ЗЕМЛЮ РУСКУЮ ОТ КОНЦА ДО КОНЦА, И КАКО КРЕСТИСЯ БАБА ВОЛОДИМЕРОВА ОЛГА (1) ПРЕЖЕ ВОЛОДИМЕРА. СПИСАНО ИАКОВОМЪ МНИХОМЪ

Отче, благослови!

Паулъ святый апостолъ, церковный учитель и светило всего мира, посылая къ Тимофею писание, глаголаше: «Чядо Тимофею, еже слыша от мене многими послухы, тоже предай вернымъ человекомъ, иже доволнеи будуть и иныхъ научити». (2) И блаженый апостолъ Лука евангелистъ къ Феофилу писаше, глаголя: «Понеже мнози начаша повести деяти о известныхъ вещехъ, бывшихъ въ насъ, изволися и мне, ходившю исперва и по всехъ писати тебе, державный Феофиле, да разумееши, о нихъже начатъ Исусъ творити же и учити». (3) Къ тому Феофилу написа Деяния апостольская и Еуангелие святый апостолъ Лука, по томъ многыхъ святыхъ писати начаша жития и мучения. Тако же и азъ, худый мнихъ Иаковъ, слышавъ от многыхъ о благовернемъ князе Володимери всея Руския земля, о сыну Святославлъ (4), и мало събравъ от многыя, добродетели его написахъ, и о сыну его, реку же святою славную мученику Бориса и Глеба, (5) како просвети благодать Божия сердце князю рускому Володимеру, сыну Святославлю, внуку Игореву (6), и возлюби и человеколюбивый Богъ, «хотяй спасти всякого человека и въ разумъ истинный прийти», (7) и вжада святого крещения.

«Якоже жадаеть елень на источники водныя», (8) тако вжада благоверный князь Володимеръ святого крещения, и Богъ сътвори хотение его. Пишеть бо ся: «Волю боящихся его сътворить и молитву ихъ услышить и спасеть я». (9) И самъ рече Господь: «Просите и преимите, ищите и обряшите, толчете и отверзется вамъ. Всякъ просяй приемлеть, ищай обрящеть, толкущему отверзется». (10) И паки рече: «Иже веру иметь и крестится, и спасенъ будеть, а иже веры не имать, не крестится, осужен будеть». (10) Взиска спасения и прия о бабе своей Олзе, како шедши къ Царюграду, и прияла бяше

святое крещение, и пожи добре предъ Богомъ, всими добрыми делы украсив-шися, и почи с миромъ о Христе Исусе и въ Bеpе блазе. То все слышавъ князь Володимеръ о бабе своей Олзе, нареченей въ святомъ крещении Елене, тоя и житие подража, такоже и святыя царици Елены (11), матере великаго царя Коньстантина житию ревнуя въ всемъ. И разгоряшеся Святымъ Духомъ сердце его, хотя святого крещения. Видя же Богъ хотение сердца его, провидя доброту его, и призре съ небесе милостью своею и щедротами. И въ Троицы славимый Богъ Отецъ, и Сынъ, и Святый Духъ на князя Володимера, «испытая сердца и утробы», (12) Богъ праведенъ, вся предведый, и просвети сердце князю Рускыя земля Володимеру прияти святое крещение.

Крести же ся самъ князь Володимеръ, и чада своя, и весь домъ свой святымъ крещениемъ просвъти, и свободи всяку душу, мужескъ полъ и же-нескъ, святого ради крещения. И възрадовася, и възвеселися о Бозе Давыдь-скы князь Володимеръ, и аки святый пророкъ дивный Аввакумъ «о Господе веселяся и радуяся» о Бозе Спасе моемъ. О, блаженное время и дьнь добрый, исполненъ всего блага, в онъже крестися Володимеръ князъ, и наре-ченъ бысть въ святомъ крещении Василей! И даръ Божий осени его, благодать Святого Духа освети сердце его, и навыче по заповеди Божий ходити и жити добре о Бозе, и Bеpy тверду удержа неподвижиму. Крести же и всю землю Рускую от конца до конца, и поганьскыя боги, паче же и бесы, Перуна и Хъроса, (13-14) и ины многы попра, и съкруши идолы, и отверже всю безбожную лесть. И церковь созда камену во имя пресвятыя Богородица (15), прибежище и спасение душамъ вернымъ, и десятину ей дасть, темъ попы набдъти и сироты, вдовица и нищая. И потомъ всю землю Рускую и грады вся украси святыми церквами. И отвержеся всея диаволи льсти, и прииде от тмы диаво-ля на светъ съ чады своими, приде къ Богу, крещение приимъ, и всю землю Рускую исторже изъ устъ диаволь и къ Богу приведе, и къ свету истиному. Рече бо Господь пророкомъ: «Изводяй от нечестия нечестиваго, аки уста моя еси». (16) И бысть князь Володимеръ аки уста Божиа и человекы изъ лести диаволя къ Богу приведе. О, колика радость и веселие бысть на земли! Ангели възвеселишася и арахангели, и святыхъ дуси възыграшася. Самъ рече Господь: «Колика радость бываеть на небесехъ о единемъ грешницъ кающимся». (17) Толико бес числа душь по всей земли Руской приведены къ Богу святымъ крещениемъ, похвалы всякыя дело постойно створи и радости духов-ныя полно.

О блаженый и треблаженый княже Володимеръ, благоверне, и хри-столюбиве, и страннолюбче, мъзда твоа многа предъ Богомъ! То же блаженый Давыдъ глаголаше: «Блаженъ человекъ, егоже ты накажеши, Господи, и от закона твоего научиши и, да укротиши и от дний лютъ». (18) Блаженый князь Володимеръ, уклонився от службы диаволя, и прииде къ Христу Богу, Владыцъ своему, и люди своя приведе, и научи я служити Богу. Самъ бо рече Господь: «Иже створить и научить, се великъ наречеться въ царствии небеснемъ». (19) А ты, блаженый княже Володимере, бысть апо-столъ въ князехъ, всю землю Рускую приведъ къ Богу святымъ крещениемъ, и научи люди кланятися Богу, славити и пети Отца, и Сына, и Святаго Духа. И вси людие Рускыя земля познаша Бога тобою, божественый княже Володимере. Възрадовашася ангельстии чини, агници честнии, ныне радуются верныи, и воспеша, и въсхвалиша! Аки младенци еврейстии съ ветвьми усретоша Христа, вопиюще: «Осанна Христу Богу, победителю смерти!», (20) тако и новоизбраннии людие Руския земля въсхвалиша Владыку Христа с Отцемъ и Святымъ Духомъ. И къ Богу приближившёся святымъ крещениемъ, и диавола отврьгшеся, и службы его поругашася, и поплеваша бесы, и познаша Бога истиннаго, творца и съдетеля всей твари. И поють по вся дни живота и на всякъ часъ песнь чудную, хвалу архангельскую: «Слава въ вышнихъ Богу, и на земли миръ, въ человецехъ благоволение!» (21) И ты, блаженый княже Володимере, подобно Констянтину Великому (22) дело сътвори, яко онъ верою великою и любовью Божиею подвигся. Утверди всю вселеную любовию и верою, и святымъ крещениемъ просвети весь миръ, и законъ Божий по всей вселеней заповъда. И разруши храмы идольския съ лжеименными богы, и святыя же церкви по всей вселеней постави на хвалу Богу, в Троицы славимому Отцу, и Сыну, и Святому Духу, и крестъ обрете, всего мира спасение. С блаженою и богомудрою матерью своей святою Оленою и съ чады многы приведе къ Богу святымъ крещениемъ бещисленое множество. И требища бесовсьскыя потреби, и храмы идольскыа разруши, и церквами украси всю вселеную и грады, и заповеда въ церковахъ памяти святыхъ творити пении и молитвами, и праздникы праздновати на славу и на хвалу Богу. Тако же и блаженый князь Володимеръ сътвори съ бабою своею Олгою.

Блаженый же князь Володимеръ, внукъ Олжинъ, крестився самъ, и чяда своя, и всю землю Рускую крести от конца до конца, храмы идольскыя и требища всюду раскопа и посече, (23) и идолы съкруши, и всю землю Рускую и грады честными церкви украси, и памяти святыхъ въ церквахъ творяше пениемъ и молитвами, и празноваше светло праздники Господьскыя. И три трапезы поставляше: первую митрополиту съ епископы, и съ черноризце, и съ попы; вторую нищимъ и убогымъ; третью собе, и бояромъ своимъ, и всемъ мужемъ своимъ. Подобя ся царемъ святымъ, блаженый князь Володимеръ, пророку Давыду, царю Иезекею, (24) и треблаженому Иосею, (25) и великому Конь-стянтину, иже избраша и изволиша Божий законъ боле всего, и послужиша Богу всемъ сердцемъ, и получиша милость Божию, и наследиша рай, и прияша царство небесное, и почиша со ВСЕМИ святыми, угожьшими Богу. Тако же и блаженый князь Володимеръ, послуживъ Богу всимъ сердцемъ и всею душею. Не дивимся, възлюбленеи, аще чюдесъ не творить по смерти, мнози бо снятии праведней не створиша чюдесъ, но святи суть. Рече бо о томъ святый Иоаннъ Златоустый: «От чего познаемъ и разумеемъ человека свята, от чюдесъ ли, или от делъ?» И рече: «От дела познати, а не от чюдесъ, много бо и вълсви чюдесъ створиша бесовскымъ мечтаниемъ». И бяху святей апостоли, и бяху лжии апостоли, и беша святей пророци, и бяху лжии пророци, слугы диаволя, ино чюдо, самъ сотона преображается въ ангелъ светелъ. Но от делъ разумети святого, яко же апостолъ рече: «Плодъ духовный есть любы, радость, терпение, благоверие, благость, кротость и въздержание. На таковыхъ несть закона». (26) Блаженый же князь Володимеръ всимъ сердцемъ и всею душею Бога възлюби и заповеди его взыска и съхрани. И вся страны боахуся его и дары ему приношаху. Възвеселися, и възрадовася о Бозе и о святъмъ крещении, и хваляшеся, и славяше Бога о всемъ томъ князь Володимеръ. И сице в радости смирениемъ сердца глаголаше: «Господи Владыко благый, помянулъ мя еси и привелъ мя еси на светъ, и познахъ тя, всея твари творца. Слава ти, Боже всехъ, Отче Господа Бога нашего Исуса Христа! Слава ти съ Сыномъ и Святымъ Духомъ, сице мя помиловавъ. Въ тме бяху, диаволу служа и бесомъ, но ты мя святымъ крещениемъ просвети. Акы зверь бяхъ, многа зла творях въ поганьстве и живяхъ акы скотина, но ты мя укроти и наказа своею благодатью. Слава ти, Боже в Троицы славимый, Отче, и Сыне, и Святый Душе! Троице Святая, помилуй мя, настави мя на путь твой и научи мя творити волю твою, яко ты еси Богъ мой!» Князь же Володимеръ поревнова святыхъ мужь делу и житию ихъ, и възлюби Аврамово (27) житие и подража странолюбию его, Иаковлю (28) истину, Моисееву (29) кротость, Давыдове безлобие, Констянтина, царя великого, перва-го царя кристианского, того подражая правоверие, боле же всего бяше милостыню творя князь Володимеръ. Иже немощныа и старыа не можаху дойти княжа двора и потребу взяти, то въ домы имъ посылаше, немощнымъ и старымъ, всяку потребу блаженый князь Володимеръ даяше. И не могу сказа-ти многыа его милостыня, не токмо въ дому своемъ милостыню творяше, но и по всему граду, не въ Киеве единомъ, но и по всей земле Руской. И въ градехъ, и въ селехъ, везде милостыню творяше, нагыа одевая, альчныя кормя и жадныя напаяя, странныа покоя милостью; церковникы чтя, и любя, и милуя, подавая имъ требование, нищая, и сироты, и вдовица, и слепня, и хромыя, и трудоватыя, вся милуя, и одьвая, и накормя, и напаяя.

Такоже пребывающу князю Володимеру въ добрыхъ делехъ, благодать Божия просвещаше сердце его и рука Господня помогаше ему, и побежаше вся врагы своя, и бояхутся его вси. Идеже идяше, одолеваше: радимице (30) победи и дань на нихъ положи, вятичи (32) победи и даны на нихъ положи, и ятвягы (33) взя, и сребреныя болгары (34) победи, и на козары (35) шедъ, победи я и дань на них положи.

Умысли же и на греческый крадъ Корсунь (36) и сице моляшеся князь Володимеръ Богу: «Господи Боже Владыко всехъ, сего у тебе прошю: даси ми градъ, да прииму и да приведу люди кристианы и попы на всю землю, и да научать люди закону христианскому». И послуша Богь молитвы его, и прия градъ Корсунь, и взя съсуды церковныя, и иконы, и мощи свяще-номученика Климента и иныхъ святыхъ.

И въ ты дни беаста цари два въ Цариграде, Констянтинъ и Василий, и посла къ нимъ Володимеръ, прося у нихъ сестры оженитися, да бы ся болма на кристианский законъ направилъ. И даста ему сестру свою, и дары многы присласта ему, и мощи святыхъ даста ему.

И тако добре поживе благоверный князь Володимеръ и сконча житие свое въ правоверней вере о Христе Исусе Господе нашемъ и съ благоверною Олгою. И та бо шедши къ Царюграду, приалз бяше святое крещение, и много сътворивъ добра въ житии семъ предъ Богомъ, и сконча житие свое въ добрей вере, и почи съ миромъ, в руце Божий душю предавше. И еще живу сущю Володимиру князю, рать бяше от печенегъ, Володимеръ же бяше болезнию одержимъ, въ той же болезни предасть душю свою въ руце Божий.

Молитва святого князя Володимера. Володимеръ князь, отходя света сего, сице моляшеся, глаголя: «Господи Боже мой, не позналъ тебе бяху, но помиловалъ мя еси и святымъ крещениемъ просветилъ мя еси, и познахъ тя, Боже всъхъ, святый творче всея твари, Отче Господа нашего Исуса Христа, слава ти съ Сыномъ и Святымъ Духомъ! Владыко Боже, не помяни моей злобе, не позналъ есмь тебе въ поганьстве, ныне же тя знаю и ведаю, Господи Боже мой, помилуй мя. Аще мя хочеши казнити и мучити за грехы моя, казни самъ мя, Господи, бесомъ не предай же мене!» И сице глаголя и моляся Богу, преда душю свою съ миромъ ангеламъ Господ-нимъ и успе. «Праведныхъ бо души въ руку Божию суть», «и мъзда имъ от Господа, и строение имъ от Вышняго, того ради приимуть венець красоты от руки Господни».

По святомъ крещении поживе блаженый князь Володимеръ 28 летъ. (37) На другое лето по крещении къ порогамъ ходи, (38) на третье Корсунь городъ взя, (39) на четвертое лъто церковь камену святыя Богородица заложи, (40) а на пятое лето Переяславль заложи, (41) въ девятое лето десятину от имения своего блаженый христолюбивый князь Володимеръ вда церкови святей Богородицъ. (42) О томъ бо и самъ Господь рече: «Идеже есть съкровище ваше, ту и сердце ваше будеть». Блаженый же князь Володимеръ имяше съкровище свое на небесехъ, съкрывъ милостынею и добрыми своими делы, тамо и сердце его бе въ царствии небеснемъ. И Богъ поможе ему, и седе въ Киеве на месть отца своего Святослава и деда своего Игоря. А Святослава князя печенезе убиша, а Ярополкъ (43) съде въ Kиeве на Mеcтe отца своего Святослава; и Олегъ, идый съ вой у Вруча града, ся обломи мостъ съ вой, и угнетоша Олга (44) въ гребли, а Ярополка убиша (45) въ Киевъ мужи Володимерове. И седе въ Киевъ князь Володимеръ въ осмое лъто по смерти отца своего Святослава, мъсяца июня в 11, въ лъто 6486. (46) Крестилъ же ся князь Володимеръ въ десятое лъто по убьении брата своего Ярополка. (47) И каашеся и плакаше блаженый князь Володимеръ всего того, елико створи въ поганьстве, не зная Бога. Познавъ же Бога истиннаго, творца небу и земли, покаявся всего и отврьжеся дьавола и бесовъ, и всея службы его, и послужи Богу добрыми делы своими и милостынею. Успе съ миромъ мъсяца июля в 15 дьнь, въ лето 6523 о Христе Исусе Господе нашемъ.